ബര്‍ലിന്‍: ജര്‍മ്മനിയിലെ പ്രവാസി മലയാളികള്‍ ഉള്‍പ്പെടെയുള്ള സാധാരണക്കാരെ നേരിട്ട് ബാധിക്കുന്ന ആരോഗ്യ പരിഷ്കരണ പാക്കേജിന് ഫെഡറല്‍ ക്യാബിനറ്റ് അംഗീകാരം നല്‍കി. ബില്യണ്‍ കണക്കിന് യൂറോ ലാഭിക്കുക എന്ന ലക്ഷ്യത്തോടെ കൊണ്ടുവന്ന ഈ പരിഷ്കാരങ്ങള്‍ നടപ്പിലാകുന്നതോടെ മരുന്നിനും ഇന്‍ഷുറന്‍സിനും ജര്‍മ്മനിയില്‍ ചെലവേറും. മിക്കവാറും 2027 മുതലായിരിക്കും ഈ മാറ്റങ്ങള്‍ പ്രാബല്യത്തില്‍ വരിക.



പ്രധാന മാറ്റങ്ങള്‍ ഇവയാണ്:

1. വിവാഹിതര്‍ക്ക് അധിക ബാധ്യത (Family Surcharge)

ഇതുവരെ ജോലിയില്ലാത്ത പങ്കാളികള്‍ക്ക് (ഭാര്യ അല്ലെങ്കില്‍ ഭര്‍ത്താവ്) പങ്കാളിയുടെ ഇന്‍ഷുറന്‍സില്‍ സൗജന്യമായി ചികിത്സ ലഭിച്ചിരുന്നു. എന്നാല്‍ പുതിയ നിയമപ്രകാരം ഇത്തരക്കാര്‍ 2.5 ശതമാനം അധിക സര്‍ചാര്‍ജ് നല്‍കേണ്ടി വരും. എങ്കിലും കുട്ടികള്‍, കൊച്ചു കുട്ടികളുള്ള മാതാപിതാക്കള്‍, പെന്‍ഷന്‍കാര്‍ എന്നിവരെ ഇതില്‍ നിന്ന് ഒഴിവാക്കിയിട്ടുണ്ട്.

2. മരുന്നുകള്‍ക്ക് വില കൂടും

കുറിപ്പടി പ്രകാരമുള്ള മരുന്നുകള്‍ക്ക് (Prescription Medicines) നല്‍കേണ്ട കുറഞ്ഞ തുക 5 യൂറോയില്‍ നിന്ന് 7.50 യൂറോയായും, കൂടിയ തുക 10 യൂറോയില്‍ നിന്ന് 15 യൂറോയായും വര്‍ദ്ധിപ്പിച്ചു. വര്‍ഷം മുഴുവന്‍ മരുന്ന് കഴിക്കേണ്ടി വരുന്നവര്‍ക്ക് ഇത് വലിയ സാമ്പത്തിക ഭാരമാകും.

3. പഞ്ചസാര നികുതി (ടൗഴമൃ ഠമഃ)
മധുര പാനീയങ്ങള്‍ക്ക് 2028 മുതല്‍ പ്രത്യേക നികുതി ഏര്‍പ്പെടുത്തും. പ്രതിവര്‍ഷം 450 മില്യണ്‍ യൂറോ വരുമാനമാണ് ഇതിലൂടെ സര്‍ക്കാര്‍ ലക്ഷ്യമിടുന്നത്. ജനങ്ങളുടെ ആരോഗ്യം സംരക്ഷിക്കാനും ഇന്‍ഷുറന്‍സ് സിസ്ററത്തിലെ ബാധ്യത കുറയ്ക്കാനും ഇത് സഹായിക്കുമെന്ന് സര്‍ക്കാര്‍ കരുതുന്നു.

4. ഉയര്‍ന്ന വരുമാനക്കാര്‍ക്ക് തിരിച്ചടി
കൂടുതല്‍ ശമ്പളം വാങ്ങുന്നവരില്‍ നിന്ന് ഇന്‍ഷുറന്‍സിനായി ഈടാക്കുന്ന തുകയുടെ പരിധി (Contribution assessment ceiling) 300 യൂറോ കണ്ട് വര്‍ദ്ധിപ്പിക്കും. ഇതോടെ ഉയര്‍ന്ന വരുമാനക്കാരുടെ മാസ ശമ്പളത്തില്‍ നിന്ന് കൂടുതല്‍ തുക ഇന്‍ഷുറന്‍സിനായി പോകും.

5. മറ്റ് ആനുകൂല്യങ്ങളിലെ കുറവ്
ഹോമിയോപ്പതി ചികിത്സകള്‍ക്കുള്ള ഇന്‍ഷുറന്‍സ് പരിരക്ഷ നിര്‍ത്തലാക്കും. കൃത്രിമ പല്ലുകള്‍ വയ്ക്കുന്നതിനുള്ള (Dentures) സബ്സിഡിയും കുറയ്ക്കാന്‍ തീരുമാനമായിട്ടുണ്ട്.

ആശ്വാസ വാര്‍ത്ത
ദീര്‍ഘകാലം അസുഖം ബാധിച്ച് അവധിയില്‍ ഇരിക്കുന്നവര്‍ക്ക് ലഭിക്കുന്ന സിക്ക് പേ (Sick Pay) വെട്ടിക്കുറയ്ക്കില്ല. നിലവിലുള്ളതുപോലെ ശമ്പളത്തിന്റെ 70 ശതമാനം തുക ഇവര്‍ക്ക് തുടര്‍ന്നും ലഭിക്കും. കൂടാതെ, അസുഖമാണെങ്കിലും ഭാഗികമായി ജോലിയില്‍ പ്രവേശിക്കാന്‍ സഹായിക്കുന്ന 'പാര്‍ഷ്യല്‍ സിക്ക് ലീവ്' (Partial Sick Leave) എന്ന പുതിയ മാതൃകയും സര്‍ക്കാര്‍ പരിഗണിക്കുന്നുണ്ട്.

പ്രവാസികള്‍ ശ്രദ്ധിക്കാന്‍: ജര്‍മ്മനിയിലെ പൊതു ആരോഗ്യ ഇന്‍ഷുറന്‍സില്‍ (Public Health Insurance) മാറ്റങ്ങള്‍ വരുത്തുന്ന ഈ ബില്‍ ഇനി ബുണ്ടെസ്ററാഗിലും ബുണ്ടെസ്രാത്തിലും പാസാകേണ്ടതുണ്ട്. എങ്കിലും ഭരണകക്ഷികള്‍ തമ്മില്‍ ധാരണയിലെത്തിയതിനാല്‍ ഈ പരിഷ്കാരങ്ങള്‍ നടപ്പിലാകുമെന്ന് ഉറപ്പായി.